Yn Gwerth yn y Fro, rydym yn cael ein hysbrydoli’n gyson gan garedigrwydd ac ymroddiad ein haelodau – a’r mis hwn, rydym yn arbennig o falch o ddathlu Lynne, y mae ei hysbryd gwirfoddoli a’i haelioni wedi gadael ôl cadarnhaol parhaol ar draws Bro Morgannwg.
From Wellbeing Garden to Gifting it Forward
Mae Lynne wedi rhoi oriau di-ri o’i hamser i greu noddfa gardd les hardd yn y Swyddfeydd Dinesig. Mae’r llecyn tawel hwn, sy’n agored i staff, yn cynnig lle tawel ac adferol i oedi, myfyrio a magu nerth newydd.
Trwy’r gwaith hwn, enillodd Lynne gredydau gyda Gwerth yn y Fro – ond mewn gweithred ryfeddol o haelioni, dewisodd beidio â’u defnyddio drosti ei hun. Yn lle hynny, rhoddodd 100 o gredydau, gwerth tua £150, i Wasanaethau Cam-drin Domestig y Fro (VDAS). Bydd y gwobrau hyn yn darparu pethau hanfodol i ddefnyddwyr gwasanaeth megis parcio am ddim, diodydd poeth, nwyddau ymolchi a chynhyrchion harddwch, gan helpu i leddfu’r heriau sy’n cael eu hwynebu yn ystod rhai o’r adegau anoddaf yn eu bywydau.
Ysbrydoli Ton o Gefnogaeth Gymunedol
Sbardunodd caredigrwydd meddylgar Lynne rywbeth llawer mwy. Wedi’u hysbrydoli gan ei hesiampl, daeth ffrindiau, cydweithwyr a phartneriaid cymunedol ynghyd i gynyddu’r effaith gyda rhoddion o arian parod, nwyddau ymolchi, teganau, dillad ac eitemau hanfodol eraill. Dyma rai o’r cyfraniadau niferus:
- Niki West-Jones a’i deulu, a roddodd arian parod a nwyddau ymolchi a chysylltodd â hyrwyddwyr cymunedol Morrisons yn y Barri a Bae Caerdydd i sicrhau cyflenwadau hael o ddillad, teganau a nwyddau ymolchi.
- Clwb Rotari’r Barri a’r Cylch, gyda chefnogaeth Lynne a David Jakeway a Jude, a ddarparodd gyda’i gilydd werth £100 o nwyddau ymolchi.
- Staff a chynghorwyr Cyngor Bro Morgannwg, ynghyd â chydweithwyr o Fwrdd Iechyd y Brifysgol yn y Swyddfeydd Dinesig, a roddodd ddewis anhygoel o nwyddau ymolchi – gyda diolch arbennig i staff y dderbynfa a fu’n rheoli ac yn croesawu’r rhoddion.
- Laura Ellis, a wnaeth rodd sylweddol o gynhyrchion misglwyf trwy Gynllun Urddas Mislif y Fro, gan sicrhau bod yr ymgyrch hon hefyd yn mynd i’r afael â mater pwysig tlodi mislif.
- A diolch arbennig iawn i fam Lynne, a roddodd £100 hael, gan adlewyrchu’r gwerthoedd haelioni’r teulu y mae Lynne wedi’u hetifeddu.
Dathliad o Ysbryd Cymunedol
Arweiniodd y caredigrwydd hwn at ddigwyddiad anrhegion arbennig, lle cyfarfu Lynne, Lianne, Nikki ac aelodau o Glwb Rotari’r Barri â Charlotte o VDAS i glywed mwy am waith hanfodol yr elusen. Roedd yn ddiwrnod dyrchafol a ddangosodd yn berffaith bŵer cydweithio – gan ddangos sut y gall unigolion a sefydliadau ddod at ei gilydd i greu newid go iawn i bobl agored i niwed.
Wrth feddwl am y profiad, dywedodd Lynne:
“Fe wnaeth y digwyddiad gwneud cymwynas yn eich tro ddwyn boddhad mawr i mi. Roedd yn hyfryd gweld sut mae gwahanol grwpiau yn ein cymuned yn gallu gweithio gyda’i gilydd, a fydd yn cael effaith enfawr a chadarnhaol ar bobl agored i niwed ym Mro Morgannwg.”
Adleisiodd y Clwb Rotari yr ymdeimlad hwn o undod:
“Yn unigol rydym yn gallu cyflawni pethau da, ond gyda’n gilydd rydym yn gallu bod yn wych. Aeth ymdrech heddiw yn bell i brofi hyn.”
Rhannodd Charlotte o VDAS neges o ddiolchgarwch diffuant:
“Mae’n rhaid i mi ddweud y ces i fy llethu pan gerddais i mewn i’r ystafell a gweld y llu o roddion – dyma’r casgliad unigol mwyaf rydyn ni wedi’i gael erioed, ac mae mor galonogol gwybod faint o bobl ystyriol a gyfrannodd at hyn.
Fel elusen fach, rydyn ni’n rhoi goroeswyr yn gyntaf. Rydym yn cael ein harwain ganddyn nhw i gefnogi eu diogelwch a’u hôl-ofal ac mae hyn oherwydd ein bod yn gwybod mai urddas, asiantaeth a hunan-barch yw’r ffactorau sy’n cyfrannu fwyaf at adferiad a thorri’r cylch camdriniaeth.
Efallai ei fod yn ymddangos fel rhan fach o’r pos ond mae bod â’r eitemau hanfodol a’r cysuron cartrefol wrth fynd i loches neu ddod i mewn i’n canolfan les am y tro cyntaf yn rhoi llygedyn bach o obaith i fenywod, eu bod yn cael eu gweld, eu clywed a’u gwerthfawrogi a bod rhywun yn gofalu amdanynt.
Rydych chi i gyd wedi chwarae rhan yn sicrhau bod hyn yn gallu digwydd, ac rwy’n hynod ddiolchgar i chi i gyd.
Diolch yn fawr.
Cydnabod Effaith Lynne
Fe wnaeth Lianne o Gwerth yn y Fro grynhoi hyn yn berffaith:
“Mae Lynne yn enghraifft ddisglair o beth yw Gwerth yn y Fro – cydnabod gwirfoddolwyr am yr amser maen nhw’n ei roi a’u cefnogi i ail-fuddsoddi’r ewyllys da honno yn ôl i’r gymuned. Yn ogystal ag ysbrydoli eraill, mae ei hymroddiad i’r ardd les a’i haelioni wrth wneud cymwynas i eraill wedi gwneud gwahaniaeth mawr i’r rhai sydd ei angen fwyaf.”
Pŵer Caredigrwydd
Mae stori Lynne yn ein hatgoffa o bŵer anhygoel gwirfoddoli. Mae’r hyn a ddechreuodd fel penderfyniad un person i roi ei hamser i ardd les wedi blodeuo i fod yn fudiad caredigrwydd sy’n cyffwrdd bywydau ymhell y tu hwnt i’w fwriad gwreiddiol.
Yn Gwerth yn y Fro, rydym yn falch o sefyll ochr yn ochr â Lynne – ac yn ddiolchgar i bob unigolyn, teulu a sefydliad a gyfrannodd. Gyda’ch gilydd, rydych chi wedi dangos, pan fydd caredigrwydd, gwaith tîm, ac ysbryd cymunedol yn dod at ei gilydd, bod bywydau’n cael eu newid er gwell.
Diolch, Lynne – a diolch i bawb a ymunodd â hi – am ein hatgoffa o effaith anhygoel rhoi yn ôl